Loma Linda Universitetinin İctimai Sağlamlıq Məktəbinin amerikalı professoru Con Şarffenberq bu yaxınlarda 101 yaşını qeyd edib.

Aztibb.az xəbər verir ki, alim “La Razon” nəşrinə müsahibəsində uzunömürlülüyün sirlərindən danışıb və qidalanma rejiminin bunda mühüm rol oynadığını bildirib.

Professorun sözlərinə görə, o, tamamilə ətsiz qidalanır. Bununla belə, yumurta və süd məhsullarından imtina etməyib. Alim bu məhsulların sağlamlıq üçün faydalı olduğunu vurğulayıb.

Con Şarffenberq şəkər istifadəsinin məhdudlaşdırılmasının da vacib olduğunu qeyd edib. Onun fikrincə, şəkər piylənmə və ürək-damar sistemi xəstəliklərinin yaranma riskini artırır.

Professor həmçinin doymuş yağları da qida rasionundan çıxardığını bildirib. O deyib ki, bu yağlar qanda xolesterinin səviyyəsini yüksəldərək ürək-damar xəstəlikləri riskini artırır.

Alim vurğulayıb ki, düzgün qidalanma sağlam həyat tərzinin yalnız bir hissəsidir. Onun fikrincə, müntəzəm fiziki aktivlik hətta pəhrizdən də daha vacibdir.