Sümük-oynaq sistemindəki zədələnmələrdə rentgen müayinəsi əvəzsiz bir vasitədir. Qırıqlar, çatlar, oynaq dislokasiyaları və digər travmatik dəyişiklikləri dəqiq göstərərək düzgün diaqnoz qoymağa imkan verir.

Bu barədə Aztibb.az-a Ağcabədi Rayon Mərkəzi Xəstəxanasının həkim-radioloqu Zamir Mehtiyev məlumat verib.

Həkim qeyd edib ki, müayinə qısa və ağrısızdır, xəstələr üçün narahatlıq yaratmır. Həmçinin zədənin tipi və dərəcəsini göstərdiyi üçün ortoped və travmatoloqlara müalicəni düzgün planlaşdırmaqda kömək edir.

Onun sözlərinə görə, travmadan sonra ağrı və ya hərəkət məhdudiyyəti varsa, vaxt itirmədən rentgen müayinəsindən keçmək zədənin düzgün qiymətləndirilməsi və komplikasiyaların qarşısının alınması üçün çox vacibdir.