Sumqayıt Şəhər İcra Hakimiyyəti və Xidmət Sahələri üzrə Sumqayıt Dövlət Peşə Təhsil Mərkəzinin birgə təşkilatçılığı ilə “Sağlamlığın qorunması: Z nəsli üçün sağlamlıq sirləri” mövzusunda tələbələrlə maarifləndirici görüş keçirilib.

 

Sumqayıt Tibb Mərkəzindən Aztibb.az-a bildirilib ki, görüşdə Sumqayıt Şəhər İcra Hakimiyyətinin nümayəndəsi Mehriban Nəcəfova, Sumqayıt şəhər Narkoloji Dispanserin baş həkimi Vüsal Cabbarov, Sumqayıt Tibb Mərkəzinin tabeliyində fəaliyyət göstərən 1 nömrəli Ailə Sağlamlıq Mərkəzinin ailə həkimi-pediatrı Fərqanə Hüseynova, mərkəzin psixoloqu Rəna Muxtarova, mərkəzin direktoru Gülşən Ömərova, mühəndis-pedaqoji heyət və tələbələr iştirak ediblər.

 

Tədbirdə çıxış edən ailə həkimi-pediatr Fərqanə Hüseynova sağlam qidalanmanın insan orqanizminə təsirlərindən geniş bəhs edib. O bildirib ki, düzgün və balanslı qidalanma immun sisteminin möhkəmlənməsində, fiziki inkişafın düzgün formalaşmasında və xroniki xəstəliklərin qarşısının alınmasında mühüm rol oynayır. Həkim gündəlik qida rasionunda vitamin və minerallarla zəngin məhsulların yer almasının vacibliyini vurğulayıb, xüsusilə fastfud və şəkərli içkilərdən uzaq durmağın əhəmiyyətini qeyd edib.

 

Fərqanə Hüseynova həmçinin yeniyetmə və gənclərin həyat tərzində fiziki aktivliyin artırılmasının vacibliyini diqqətə çatdıraraq bildirib ki, düzgün qidalanma ilə yanaşı, hərəkətli həyat tərzi sağlam gələcəyin əsas şərtlərindəndir. O, valideynlərin və müəllimlərin bu istiqamətdə maarifləndirici rolunun da xüsusi əhəmiyyət daşıdığını qeyd edib.

 

Görüşdə çıxış edən Mehriban Nəcəfova, Vüsal Cabbarov və Rəna Muxtarova da sağlam həyat tərzinin təşviqi, zərərli vərdişlərin mənfi təsirləri və psixoloji sağlamlığın qorunması ilə bağlı fikirlərini bölüşərək iştirakçılara tövsiyələr veriblər.

 

Sonda görüş interaktiv şəkildə davam edib, tələbələri maraqlandıran suallar cavablandırılıb və onlara sağlam həyat tərzi ilə bağlı faydalı məsləhətlər təqdim olunub.