Akademik Zərifə Əliyeva adına Milli Oftalmologiya Mərkəzinin Dəmiryol Səyyar Klinikası tərəfindən akademik Zərifə Əliyevanın anadan olmasının 103-cü ildönümünə və Mərkəzin 80 illik yubileyinə həsr olunmuş tibbi aksiya Astara rayonunda keçirilib.

Bu barədə Aztibb.az-a Mərkəzdən xəbər verilib.

Bildirilib ki, aksiyanın əsas məqsədi əhali arasında göz sağlamlığı ilə bağlı problemlərin vaxtında aşkarlanması, eləcə də profilaktik tədbirlərin həyata keçirilməsinə dəstək göstərmək olub.

İki gün davam edən aksiya çərçivəsində ümumilikdə 250 nəfər müayinədən keçirilib. Pasiyentlərə ilkin diaqnozlar qoyulub, zəruri hallarda əlavə müalicə və müayinələr tövsiyə edilib. Bununla yanaşı, aparılan müayinələr əsasında göz xəstəlikləri üzrə monitorinqlər həyata keçirilib, əldə olunan nəticələr peşəkar tibbi heyət tərəfindən təhlil olunub.

Müayinələrə Milli Oftalmologiya Mərkəzinin Masallı filialının həkimləri – Samir İbadov, Hikmət Əzizi və Möhsün Əliəkbərov cəlb olunublar.

Tibbi aksiyanın təşkilində Səyyar Klinikanın baş həkimi Elçin Həsənov və digər texniki heyət üzvləri fəal iştirak edib.