Çinli alimlər Ay torpağından su çıxarıb onu oksigen və yanacağa çevirən texnologiya yaradıblar. Bu, yerli resurslardan istifadə sayəsində Ay bazalarının qurulmasını asanlaşdıra bilər.   

Aztibb.az-ın www.newscientist.com-a istinadla xəbərinə görə, mütəxəssislər "Chang'e 5" missiyası çərçivəsində Yerə gətirilmiş Ay reqoliti (Ayın qırıntılardan ibarət olan ən üst səth qatı)  nümunələrindən istifadə edərək kompleks  həll yolu tapıblar. Onların texnologiyası eyni anda torpaqdan su çıxarır və karbon qazını oksigenə və yanacaq üçün kimyəvi komponentlərə çevirir. Bu prosesin əsas elementi fototermal katalizdir - günəş işığını kimyəvi reaksiyalar üçün istiliyə çevirən proses.

Alimlər Ay torpağında olan mineralın  bu prosesdə katalizator kimi xüsusilə effektiv olduğunu vurğulayıblar.

Yeni metod eyni anda iki problemi həll edir: nəfəs almaq üçün oksigenin istehsalı, texnika üçün yanacağın yaradılması. Tədqiqat rəhbəri Lu Wang bildirib ki, hazırda katalitik proseslərin effektivliyi tam şəkildə həyatın təmin olunması üçün yetərli deyil.

Tədqiqatçılar sistemi daha da effektivləşdirməyi planlaşdırırlar. Texniki maneələrin aradan qaldırılması və texnologiyanın maya dəyərinin azaldılması, gələcək Ay missiyalarında bu texnologiyanın praktik tətbiqi üçün əsas amil olacaq.