Səhiyyə Nazirliyinin 2 nömrəli Klinik Psixiatriya Xəstəxanasında stasionar pasiyentlər üçün yaradıcı emalatxana fəaliyyətə başlayıb.

Xəstəxanadan Aztibb.az-a bildirilib ki, bu layihə onların sosial adaptasiyasını, psixi sağlamlığını dəstəkləməklə yanaşı, asudə vaxtlarının səmərəli təşkilinə və yaradıcı bacarıqlarının üzə çıxarılmasına xidmət edir.

Yeni yaradılan emalatxanada pasiyentlər bədii-tətbiqi sənət nümunələri, toxuculuq, rəsm və təbii materiallarla əl işləri hazırlayacaqlar. Bu fəaliyyətlər onlara özünüifadə imkanı verərək müalicə prosesinə əlavə psixososial dəstək rolunu oynayacaq.

Gələcək planlara əl işlərinin sərgilənməsi və gələcəkdə satış-sərgilərin təşkili də daxildir. Bu həm pasiyentlərin zəhmətinə verilən dəyəri göstərmək, həm də onların cəmiyyətə inteqrasiyasına töhfə vermək məqsədi daşıyır.Yaradıcılıq emalatxanası ilə xəstəxanada yeni bir yanaşma formalaşır: burada pasiyentlər yalnız müşahidə olunan deyil, həm də yaradan, dəyər qatan, cəmiyyətə mesaj göndərən fərdlərə çevrilirlər.