İngiltərəli alimlər beynimizin vərdişləri necə öyrəndiyinə dair mühüm kəşfə imza atıblar. Araşdırma zamanı məlum olub ki, beyində yalnız  öyrənmə deyil, həm də təkrarlanan davranışları gücləndirən ikinci sistem mövcuddur.

Aztibb.az-ın xəbərinə görə, "Nature" jurnalında dərc olunan tədqiqatın nəticələri göstərib ki, beyin iki fərqli dopamin siqnalı vasitəsilə öyrənir: mükafat (RPE) və hərəkət proqnozu xətası (APE). RPE nəticələrin qiymətləndirilməsinə xidmət edir, APE isə tez-tez edilən hərəkətləri möhkəmləndirir. Xüsusilə striatumun quyruğu adlı hissədə kodlanan APE sistemi vərdişlərin davamlı formalaşmasında əsas rol oynayır. Bu bölgə zədələnəndə vərdişlər inkişaf etmir.

Tədqiqat pis vərdişlərin niyə tərk edilməsinin çətin olduğunu da açıqlayır: Beyin bir hərəkəti çox təkrar etdikdə, onu dəyərsizləşdirmədən mövcud hal kimi qəbul edir. Amma yeni vərdişlərin köhnələrinin yerini tutması mümkündür. Bu kəşf asılılıq və Parkinson kimi xəstəliklərin müalicəsində yeni perspektivlər vəd edir.