Britaniyanın Lids Universitetinin psixoloqları hesab edirlər ki, stresin qiymətləndirilməsi və qavranılan stres uşaq travmaları ilə yetkinlik dövründə müşahidə edilən depressiya, təşviş, özünü aciz hissetmə və sıxıntı arasında əsas əlaqələndirici rolunu oynayır.

Aztibb.az xəbər verir ki, “PLOS On” jurnalında dərc olunan “Uşaq travmasının yetkinlik dövründə psixi sağlamlıq nəticələrinə, intihar riski amillərinə və stresin qiymətləndirilməsinə təsiri” adlı araşdırmanın məqsədi uşaq travmasının yetkin yaşda psixi sağlamlıq nəticələri (depressiya, təşviş), intihar riskini artıran amillər (acizlik hissi, sıxıntı) və streslə bağlı nəticələrlə (stresin qiymətləndirilməsi, qavranılan stres) əlaqəli olub-olmadığını müəyyənləşdirmək, həmçinin uşaq travmasının bu nəticələrə təsirində stresin qiymətləndirilməsi və qavranılan stresin vasitəçi rolunu araşdırmaq olub.

Bir həftəlik fasilə ilə iki sessiyadan ibarət onlayn tədqiqatda 273 nəfər iştirak edib. Birinci sessiyada iştirakçılar uşaq travmaları ilə bağlı sorğunu cavablandırıblar. İkinci sessiyada isə son bir həftə ərzindəki depressiya, təşviş, acizlik hissi, sıxıntı, stresin qiymətləndirilməsi və qavranılan stres səviyyəsini ölçən sorğuları doldurublar.

Təhlillər göstərib ki, uşaq travması daha yüksək depressiya, təşviş, acizlik hissi və sıxıntı ilə əhəmiyyətli dərəcədə əlaqəlidir. Həmçinin uşaq travması stresin qiymətləndirilməsi və qavranılan stres vasitəsilə dolayısı ilə depressiya, təşviş, acizlik hissi və sıxıntıya təsir göstərir.

Bu nəticələr uşaq travmasının yetkinlik dövründə psixi sağlamlıq və intihar riski amillərinə davamlı təsirini, bunun isə gündəlik həyatda qarşılaşılan stresin qiymətləndirilməsi yolu ilə baş verdiyini bir daha vurğulayır.