Patent Foramen Ovale (PFO) ürəyin sağ və sol qulaqcıqları arasında yerləşən və doğuşdan sonra tam bağlanmayan bir dəlikdir. Normalda, ana bətnində olarkən bu dəlik qan dövranının düzgün işləməsi üçün zəruridir, lakin doğuşdan sonra bağlanmalı və artıq funksiyasını itirməlidir.

Bu barədə Aztibb.az-a məlumat verən Xətai Tibb Mərkəzinin kardioloqu İradə Mahmudova bildirib ki, PFO bəzi insanlarda həmin dəliyin tam bağlanmaması və açıq qalması deməkdir. Bu hal adətən heç bir əlamət vermədən, təsadüfi olaraq aşkarlanır.

Onun sözlərinə görə, tibbi baxımdan PFO əhalinin təxminən 25 faizində rast gəlinir və bir çox insan üçün heç bir fəsad yaratmır.

Kardioloq qeyd edib ki, müəyyən hallarda PFO ciddi sağlamlıq problemlərinə, xüsusilə də qan laxtalarının ürəyin sağ tərəfindən sol tərəfə keçərək beyinə və ya digər orqanlara emboliya riski yaratdığı hallarda səbəb ola bilər. Buna görə də, PFO-nun diaqnozu və izlənməsi tibbi cəhətdən vacibdir.