Fransalı alimlər  dünyanın ən nadir qan qrupunu aşkar ediblər. "Qvada-mənfi" adlandırılan  yeni qan qrupu Qvadelupadan olan qadında tapılıb.

Aztibb.az www.livescience.com-a istinadla xəbər verir ki, "Sciencealert"də dərc edilən məlumata görə, sözügedən kəşf adi qan testi zamanı qeyri-adi reaksiyaların müşahidə olunması ilə edilib. Qadının plazması, hətta onun qardaşları da daxil olmaqla sınaqdan keçirilən bütün donor qan nümunələrinə qarşı güclü immun reaksiyası göstərib ki, bu da uyğun donor tapmağı qeyri-mümkün edib. Kəşf almləri insanlarda mövcud olan çoxsaylı qan qrupu sistemlərinə dair bilgiləri yenidən nəzərdən keçirməyə vadar edir. Əhalinin böyük əksəriyyətinin tanıdığı A, B, AB və O qan qrupları ilə Rh sistemindən kənarda, beynəlxalq miqyasda tanınan 47 qan qrupu sistemi mövcuddur. Hər bir sistem eritrositlərin səthində yerləşən spesifik zülal və şəkər molekullarına əsasən təyin olunur.

Qvadelupalı xəstənin sirli qanının səbəbini aydınlaşdırmaq üçün alimlər genetik analizlərə müraciət ediblər. Bütün ekzomun ardıcıllığını müəyyənləşdirməklə, yəni 20 mindən artıq insan genini analiz etməklə tədqiqatçılar "PIGZ" adlı gendə mutasiya aşkarlayıblar. Bu gen qırmızı qan hüceyrələrinin səthindəki molekullara şəkər birləşdirilməsi ilə əlaqəli  fermentin sintezində iştirak edir. Mutasiya nəticəsində bu fermentin fəaliyyəti pozulub, nəticədə eritrositin səthində fərqli antigen yaranıb. Bu kəşf təkcə transfuziya sahəsində deyil, həm də  genetika müxtəlifliyi və fərdi tibbi yanaşmalar baxımından da mühüm əhəmiyyət daşıyır.