Sağlamlığa nə qədər tez qayğı göstərməyə başlansa, bir o qədər  xroniki xəstəliklərin qarşısını almaq mümkündür. Uzun illərdir ki, alimlər kişilərdə ən ciddi xroniki xəstəliklərin hansı yaşdan sonra üzə çıxdığını araşdırırdılar. Nəhayət, ABŞ və Finlandiyadan olan mütəxəssislər sualın cavabını tapıblar.

Aztibb.az xəbər verir ki, Texas Sağlamlıq Mərkəzi və Helsinki Universitet Xəstəxanasının birgə araşdırmasına görə, kişilər üçün ən həssas dövr 40-60 yaş aralığıdır. Bu yaşlarda ürək-damar xəstəlikləri tez-tez kəskinləşir, nevroloji pozuntular meydana çıxır və ilk autoimmun xəstəliklərin əlamətləri görünməyə başlayır. Bu dövrdə müntəzəm sağlamlıq nəzarəti xüsusilə  vacibdir.

Qadınlarda isə bu dəyişikliklər bir qədər erkən - 30 yaşından sonra özünü büruzə verir. Bu, estrogen səviyyəsinin azalması və reproduktiv funksiyaların zəifləməsi ilə bağlıdır.

Hormonların dəyişməsi osteoporoz, yaşla bağlı katarakta, metabolik pozuntular və bəzi prekanseroz (xərçəngəqədərki) vəziyyətlərin yaranma riskini artırır. Bu səbəbdən kişilərə həssas dövrlərdə  qan təzyiqi, nəbz, xolesterin, qan şəkərinin səviyyəsi, ürək fəaliyyətinin yoxlanması, çəkiyə nəzarət və tez-tez baş ağrısı, yorğunluq  kimi simptomlara xüsusi diqqət vermələri tövsiyə edilir. Qadınlara isə hormon səviyyələrinin izlənməsi (estrogen, progesteron və s.), ginekoloq, endokrinoloq və oftalmoloq müayinələri, sümük sıxlığının  (osteoporoz riski) yoxlanılması məsləhət görülür.