İndiyə qədər düşünülürdü ki, 120/80 millimetr civə sütunu səviyyəsində olan arterial təzyiq ürək-damar sağlamlığının "qızıl standartı"dır və bu göstəricidə infarkt, insult riski minimum olur.

Aztibb.az xəbər verir ki, son elmi araşdırma bu mifi alt-üst edib.

Araşdırmada 1500 nəfər iştirak edib, onların heç birində piylənmə, şəkərli diabet və ya siqaret kimi klassik ürək-damar risk faktorları olmayıb. Nəticələr göstərib ki,  hətta "normal" hesab edilən təzyiq belə ürək xəstəliklərindən müdafiə etmir. Sistolik təzyiqin (yuxarı göstərici) hər 10 millimetr yüksəlməsi, ürək problemlərinin yaranma ehtimalını əhəmiyyətli dərəcədə artırır. Xüsusilə 120-129  arası təzyiqi olanlarda xəstələnmə riski 90-99 millimetr təzyiqə malik şəxslərlə müqayisədə 5 dəfə çoxdur.

Kardioloqlar bildirirlər ki, təzyiqin "normal" və "təhlükəli" sərhədi çox incədir və hətta kiçik  artım belə ciddi xəbərdarlıq siqnalı kimi qəbul edilməlidir.

Mütəxəssislər hesab edirlər ki, "ideal təzyiq"  norması hər kəs üçün fərqlidir. Ona görə də yalnız rəqəmlərə deyil, damarların ümumi vəziyyətinə və ürəyin hətta gizli yüklənmə əlamətlərinə də diqqət yetirilməlidir.