Naxçıvan Muxtar Respublikasında hemodializ xidmətlərinin müasir tələblərə uyğunlaşdırılması və dializ xəstələrinə göstərilən tibbi xidmətin keyfiyyətinin artırılması istiqamətində tədbirlər davam etdirilir. Bu məqsədlə Culfa Regional Tibb Mərkəzinin tabeçiliyində fəaliyyət göstərən Ordubad Rayon Mərkəzi Xəstəxanasına müasir hemodializ cihazları və pasiyentlərin müalicəsinin rahat təşkilinə imkan verən hemodializ kresloları təhvil verilmişdir.

Bu xəbər Aztibb.az-a Naxçıvan MR Səhiyyə Nazirliyindən verilib.

Təqdimat mərasimində Naxçıvan Muxtar Respublikasının səhiyyə naziri Samiq Sadıxov və Ordubad Rayon İcra Hakimiyyətinin başçısı Rəcəb Rəhimli iştirak etmişlər. Səhiyyə naziri Samiq Sadıxov çıxışında qeyd etmişdir ki, müasir avadanlıqlarla təminat regionda nefroloji xidmətlərin səviyyəsinin yüksəldilməsinə xidmət edəcək.

Ordubad Rayon İcra Hakimiyyətinin başçısı Rəcəb Rəhimli isə bildirib ki, əhalinin sağlamlığının qorunması istiqamətində həyata keçirilən bu kimi layihələr rayon sakinlərinin həyat keyfiyyətinin yaxşılaşdırılmasına töhfə verir.