Respublika Təcili və Təxirəsalınmaz Tibbi Yardım Mərkəzinə Binəqədi rayonu ərazisindən doğuş prosesi ilə bağlı təcili çağırış daxil olub. Çağırış ünvanına təcili tibbi yardım briqadası cəlb edilib.

Mərkəzdən Aztibb.az-a bildirilib ki, hadisə yerində Təcili tibbi yardım həkimi Xəlil İsmayılov tərəfindən 39 həftəlik hamilə olan 30 yaşlı qadının doğuş prosesi peşəkar şəkildə həyata keçirilib. Doğuş prosesi birbaşa yaşayış ünvanında icra olunub, daha sonra da proses təcili tibbi yardım avtomobilində nəzarətdə saxlanılıb.

Təcili tibbi yardım briqadası tərəfindən ana və yenidoğulmuş oğlan uşağı zəruri ilkin tibbi yardım göstərildikdən sonra müvafiq tibb müəssisəsinə təxliyə olunub.

Hazırda ananın müalicəsi xəstəxanada davam etdirilir, vəziyyəti stabildir. Çəkisi 3 kq. 500 qr., boyu 50 sm olan körpənin də müalicəsi davam etdirilir və vəziyyəti qənaətbəxşdir.