Region xəstəxanalarının inkişaf etdirilməsi, xəstəxanaların fəaliyyətinin modernləşdirilməsi, səhiyyə infrastrukturunun yenilənməsi, yeni cərrahi əməliyyatların icrasına başlanılması ilə tibbi xidmət əlçatanlığının təmin edilməsi istiqamətində tədbirlər davam etdirilir.

TƏBİB-dən Aztibb.az-a bildirilib ki, Qax Rayon Mərkəzi Xəstəxanasında endoskopik üsulla uroloji əməliyyatlara başlanılıb. Artıq bu üsulla iki müxtəlif uroloji əməliyyat uğurla başa çatıb.

Tibb müəssisəsinə müraciət edən rayon sakini, 50 yaşlı (qadın) pasiyent üzərində poliplərin rezeksiyası və 73 yaşlı (kişi) digər rayon sakini üzərində hematuriya səbəbi ilə diaqnostik sistoskopiya və sidik kisəsinin qanaxmasının endoskopik dayandırılması əməliyyatları həyata keçirilib. Hər iki əməliyyatdan sonra pasiyentlərin vəziyyəti qənaətbəxş qiymətləndirilib və ambulator müalicə üçün evə buraxılıb.

Məlumat üçün bildirək ki, əvvəllər bu cür cərrahi əməliyyatlar üçün sakinlər ətraf rayon və şəhərlərə, o cümlədən paytaxt Bakıda ixtisaslaşmış tibb müəssisələrinə göndəriş vərəqələri əsasında yönləndirilirdi. TƏBİB tərəfindən həyata keçirilən yeniliklər nəticəsində rayon sakinləri bundan sonra Qax Rayon Mərkəzi Xəstəxanasında sözügedən cərrahi əməliyyatlardan rahatlıqla yararlana biləcəklər.

Qeyd edək ki, cərrahi əməliyyatlar İcbari Tibbi Sığorta üzrə Dövlət Agentliyinin Xidmətlər Zərfi çərçivəsində həyata keçirilir.