TƏBİB regionlarda ixtisaslaşdırılmış tibbi xidmətlərin keyfiyyətinin yüksəldilməsi, xəstəxanaların müasir texnoloji avadanlıqlarla təchiz edilməsi və müxtəlif cərrahi əməliyyatların icrası üçün zəruri şəraitin yaradılması istiqamətində tədbirləri davam etdirir.

Aztibb.az-a TƏBİB-dən bildirilib ki, Quba Regional Travmatoloji Mərkəzdə icra olunan daha bir mürəkkəb əməliyyat uğurla başa çatıb.

Mərkəzdə 65 yaşlı pasiyentin sağ baldırının 1/3 arxa səthində damar ayaqcığına (a. suralis, perforant budaqları) əsaslanan dəri grefti köçürülüb. İlk dəfə icra olunan bu əməliyyat müsbət nəticə verib. Sağ baldırın arxa səthində post-travmatik yumşaq toxuma defekti üzrə əməliyyatdan sonra pasiyentin vəziyyəti qənaətbəxş qiymətləndirilib. Hazırda tibb müəssisəsinin müvafiq şöbəsində müalicəsini davam etdirir.

Qeyd edək ki, Quba Regional Travmatoloji Mərkəzdə bu cür mürəkkəb cərrahi əməliyyatların həyata keçirilməsi üçün hər bir şərait yaradılıb.

Mərkəz Quba rayonu ilə yanaşı, Xaçmaz, Qusar, Şabran və Siyəzən rayonlarının əhalisinə də travmatoloji xidmətlər göstərir. Eyni zamanda mürəkkəb klinik hallarda regionun digər tibb müəssisələrinə konsultativ-diaqnostik yardım göstərilir.

Mərkəzin yaradılmasında əsas məqsəd region əhalisinin ixtisaslaşdırılmış tibbi xidmətə əlçatanlığını təmin etməkdir.