Quba Rayon Mərkəzi Xəstəxanasının və Respublika Endokrinoloji Mərkəzin birgə təşkilatçılığı ilə “Endokrin xidmətin təkmilləşdirilməsi” mövzusunda regional elmi-praktik tədbir baş tutub.

 

Aztibb.az-a Quba RMX-dan verilən xəbəə görə, tədbirdə Respublika Endokrinoloji Mərkəzin direktoru Kəmalə Ağayeva, Quba Rayon Mərkəzi Xəstəxanasının direktoru Əliyar Sərvərov, eyni zamanda Quba, Qusar, Xaçmaz, Şabran və Siyəzən rayonlarından olan endokrinoloq, ginekoloq və pediatrlar iştirak edib.

 

Tədbirin məqsədi şəkərli diabet tip 1 və tip 2 xəstəliklərinin müasir müalicə və idarəetmə strategiyalarının müzakirəsi, profilaktik tədbirlərin təşviqi və region həkimlərinin praktik biliklərinin artırılması olub.

 

Tədbirdə Respublika Endokrinoloji Mərkəzin həkim-endokrinoloqu Ülviyyə Ələkbərova şəkərli diabet tip 2 xəstəliyinin müalicəsi və idarə olunması üzrə müasir klinik protokollar, diabetik nefropatiya və hestasiyon diabetin idarəsində yeni texnologiyalarla bağlı təqdimatla çıxış edib.

 

Respublika Endokrinoloji Mərkəzin həkim-endokrinoloq-pediatrı Mehriban Aslanova şəkərli diabet tip 1 xəstəliyinin etiologiyası, diaqnostikası və müalicə prinsipləri haqqında iştirakçılara ətraflı məlumat verib.

 

Respublika Endokrinoloji Mərkəzin həkim-nevroloqu Aynurə Hacıyeva diabetik retinopatiya və diabetik neyropatiyanın erkən diaqnostikası və müasir müalicə yanaşmaları barədə çıxış edib.

 

İnteraktiv formada davam edən tədbir çərçivəsində müxtəlif mövzular üzrə müzakirələr aparılıb və suallar cavablandırılıb.