TƏBİB region xəstəxanalarında infrastrukturun yaxşılaşdırılması, ixtisaslaşdırılmış tibbi xidmətlərin keyfiyyətinin yüksəldilməsi, maddi-texniki bazanın təkmilləşdirilməsi, xəstəxanaların ən son texnoloji avadanlıqlarla təchiz edilməsi və o cümlədən müasir kompüter tomoqrafiyası (KT) və maqnit rezonans tomoqrafiya (MRT) sahəsində yenilikləri davam etdirir.

TƏBİB-dən Aztibb.az-a bildirilib ki, artıq Zaqatala Rayon Mərkəzi Xəstəxanasında da kompüter tomoqrafiyası (KT) və maqnit rezonans tomoqrafiya (MRT) müayinəsinin həyata keçirilməsi mümkündür. Tibb müəssisəsində sahə üzrə zəruri müayinələrin həyata keçirilməsi üçün yeni imkanlar yaradılıb.

Məlumat üçün bildirək ki, əvvəllər rayon sakinləri analoji xidmətlər üçün ətraf rayon və şəhərlərə üz tuturdular. Artıq tibb müəssisəsində fəaliyyətə başlayan müasir kompüter tomoqrafiyası (KT) və maqnit rezonans tomoqrafiya (MRT) müayinəsi xidmət çeşidliliyinin artırılması ilə yanaşı, əhalinin tibbi xidmətlərə əlçatanlığını da təmin etmiş olacaq.

Xatırladaq ki, bu ilin aprel ayından etibarən MRT və KT müayinələri əlaqədar ölkəmizdə yeni ödəmə qaydası tətbiq olunur. Azərbaycan Respublikasının Nazirlər Kabinetinin 24 aprel 2025-ci il tarixli 134 nömrəli Qərarına əsasən “İcbari tibbi sığorta üzrə Xidmətlər Zərfi”nə dəyişiklik edilib.

Dəyişikliyə əsasən, vətəndaşlar ixtisaslı həkimin göndərişi əsasında ambulator şəraitdə göstərilən bu tibbi xidmətlər üzrə Xidmətlər Zərfindəki tarifin 20 faizi həcmində müştərək maliyyələşmə məbləği ödəyirlər. Tibbi xidmətin tarifi üzrə qalan məbləğ isə İcbari Tibbi Sığorta üzrə Dövlət Agentliyi (Agentlik) tərəfindən qarşılanır.