Qobustan Rayon Mərkəzi Xəstəxanasının Cərrahiyyə şöbəsində uroloq-cərrah Anar Məmmədovun rəhbərliyi və ümumi cərrah Yunis Həsənli, anestezioloq Orxan Məmmədlinin iştirakı ilə bölgədə ilk dəfə açıq prostat əməliyyatı həyata keçirilib.
Bu məlumat Aztibb.az-a Qobustan RMX-dan verilib.
Bildirilib ki, əməliyyat 55 yaşlı kişi pasiyent üzərində uğurla icra olunub.
Pasiyent uzun müddətdir sidik ifrazında çətinlik, tez-tez sidiyə çıxma, gecə sidiyə oyanma və sidik saxlamada problemlərlə üzləşdiyi üçün mütəxəssislərə müraciət edib.
Müvafiq laborator və instrumental müayinələr nəticəsində ona xoşxassəli prostat hiperplaziyası diaqnozu qoyulub. Konservativ müalicənin effekt verməməsi səbəbindən əməliyyat qərarı verilib. Hazırda pasiyentin vəziyyəti stabildir və stasionar şəraitdə müalicəsi davam etdirilir.
Qeyd edək ki, yüksək peşəkarlıqla və beynəlxalq tibbi protokollara uyğun şəkildə icra olunan əməliyyat İcbari Tibbi Sığorta üzrə Dövlət Agentliyinin Xidmətlər Zərfi çərçivəsində həyata keçirilib.
