TƏBİB “Uşaqların icbari dispanserizasiyadan keçirilməsinə dair Dövlət Proqramı”nın təmin edilməsi istiqamətində tədbirləri davam etdirir.

 

Xızı Rayon Mərkəzi Xəstəxanasının tibb heyəti tərəfindən “Uşaqların icbari dispanserizasiyadan keçirilməsinə dair Dövlət Proqramı”na uyğun olaraq uşaqların ilkin müayinələri həyata keçirilir.

 

Xəstəxanadan Aztibb.az-a verilən məlumata görə, Xızı rayonunda yerləşən tam orta məktəbdə, kənd və qəsəbələrdə yerləşən məktəblərdə baş tutan müayinələr zamanı həkim-pediatr, həkim-stomotoloq, həkim-oftalmoloq, həkim-otorinolarinqoloq, həkim-cərrah və s. ixtisaslı mütəxəssislər tərəfindən uşaqlar icbari dispanserizasiya çərçivəsində müayinə olunublar.

 

Xəstəlik aşkarlanan uşaqlarla bağlı məlumatlar həm məktəb rəhbərliyinə, həm də valideynlərə təqdim edilib. Həmin şagirdlərin qısa zamanda ilkin səhiyyə xidməti göstərən tibb müəssisələrinə müraciət edərək geniştərkibli müayinələrdən keçməsi və aşkarlanan xəstəliklərin müalicəsinə başlanması tövsiyə olunub.

 

Qeyd edək ki, uşaqların icbari dispanserizasiyası Azərbaycan Respublikasının Prezidentinin 5 mart 2013-cü il Fərmanına uyğun olaraq davam etdirilir.

İcbari dispanserizasiyasının əsas məqsədi uşaqlar, o cümlədən məktəblilər arasında xəstələnmə, sağlamlıq imkanlarının məhdudluğunun və ölüm səviyyəsinin azaldılmasıdır