Yeni Klinikanın Reproduktiv sağlamlıq və ailə planlaması mərkəzinin mama-ginekologiya komandası icbari tibbi sığortanın Xidmətlər Zərfi çərçivəsində riskli qeysəriyyə əməliyyatını uğurla həyata keçirib.

 

Bu barədə Aztibb.az-a Klinikadan xəbər verilib.

 

Bildirilib ki, daha öncə iki dəfə riskli hamiləlik keçirərək qeysəriyyə əməliyyatı ilə doğum edən pasiyent üçüncü hamiləliyi zamanı uzman cərrah mama-ginekoloq Sevinc Məmmədovanın nəzarəti altında izlənilib. Hamiləliyin 23-24-cü həftələrində icra edilən doppler və ultrasəs müayinələri nəticəsində ciftin yapışma anomaliyasından (plasenta perkreata) şübhələnilmiş və xəstə daimi nəzarətə götürülüb. Daha sonra hamiləliyin 32-ci həftəsində aparılan MRT müayinəsi ilə diaqnoz təsdiqlənib. Fetal respirator distress sindromunun (RDS) profilaktikasından sonra xəstə planlı şəkildə qeysəriyyə əməliyyatına hazırlanıb.

 

Əməliyyat, uzman cərrah mama-ginekoloqlar Sevinc Məmmədova və Nəzrin Məmmədova tərəfindən uğurla icra olunub. Plasenta perkreata diaqnozuna baxmayaraq, əməliyyat zamanı orqan (uşaqlıq) qoruyucu cərrahiyyə tətbiq olunub. Nəticədə, 2.700 kq çəki və 46 sm boyunda sağlam oğlan uşağı dünyaya gəlib.

 

Əməliyyatdan sonra ana bir neçə gün Reanimasiya şöbəsinin müdiri Emil Qasımovun nəzarəti altında saxlanılıb. Həyati göstəricilər stabilləşdikdən sonra isə stasionar müalicə üçün Mama-Ginekologiya şöbəsinə köçürülüb. Vəziyyəti qənaətbəxş olan ana və yeni doğulmuş körpə ambulator müalicəyə davam etmək üçün evə buraxılıb.

 

Məlumat üçün bildirək ki, ciftin yapışma (invaziya) anomaliyası - ciftin uşaqlıq divarına və bəzən qonşu orqanlara qədər dərinləşərək yapışması ilə xarakterizə olunur. Bu patologiya orta hesabla hər 10.000 doğuşdan birində müşahidə edilir. Ən önəmli risk faktoru daha əvvəl keçirilmiş qeysəriyyə əməliyyatıdır. Əgər plasenta əvvəlki əməliyyatdan sonra yaranmış çapıq nahiyəsinə invaziya edərsə, plasentanın yapışma anomaliyası demək olar ki, qaçılmaz olur. Bu vəziyyət ağır qanaxmalara səbəb olaraq ananın həyatını riskə ata bilər.

 

Həkimlər hamiləliyin 34-36-cı həftələri arasında əməliyyat aparılmasını ideal hesab edirlər. Lakin belə hallarda əməliyyat zamanı ağırlaşmalar – güclü qanaxma, sidik kisəsi, sidik axarları və nadir hallarda yoğun bağırsağın zədələnməsi kimi fəsadlar yarana bilər. Bundan əlavə, iri damarların zədələnməsi həyati təhlükə yarada biləcək ciddi qanaxmalara səbəb ola bilər. Lakin vaxtında müdaxilə və dəqiq tibbi nəzarətlə bu risklərin minimuma endirilməsi mümkündür.