Ankara Bilkent Şəhər Xəstəxanası Biokimya Laboratoriyası koordinatoru, prof. Özcan Erel tərəfindən hazırlanan və bədəndəki kimyəvi stressi ölçən yerli araşdırma dəsti dünyanın 20-dən çox ölkəsinə ixrac edilir.

Aztibb.az bu barədə medimagazin.com.tr-yə istinadla xəbər verir ki, Yıldırım Beyazıt Universiteti Tibb fakültəsinin də müəllimi olan Özcan Erel ABŞ-ın Stenford Universitetinin koordinasiyasında həyata keçirilən “Dünyanın Ən Nüfuzlu Alimləri” siyahısında birinci yerdədir. O, bir çox milli və beynəlxalq elmi mükafatlara layiq görülüb. Sonuncu dəfə Prezident Rəcəb Tayyib Ərdoğandan "Əsas Tibb Elmləri" kateqoriyasında İbn Sina Xidmət Mükafatını alıb.

Bədəndəki kimyəvi stresslə əlaqədar "oksidləşdirici stress" adlı tədqiqat aparan və bu mövzuda ilk yerli araşdırma dəstini hazırlayan Erel bu barədə açıqlamalar verib. O, hazırladığı tədqiqat dəstlərinin beynəlxalq miqyasda geniş istifadə sahəsinə malik olduğunu vurğulayıb.

Prof. Özcan Erel, araşdırma dəstlərinin ölkəyə daha əvvəl idxal edilən analoqlarını əvəzlədiyinə və məhsulların xaricə ixracının iqtisadiyyata əlavə dəyər verdiyinə diqqət çəkib.