"İşğaldan azad olunmuş ərazilərə Böyük Qayıdış” proqramı Azərbaycan Respublikasının ən vacib prioritetləri sırasındadır. Proqram çərçivəsində Səhiyyə Nazirliyi işğaldan azad olunan ərazilərə köçürülən vətəndaşlar arasında sağlam həyat tərzinin təşviqi ilə bağlı tədbirləri davam etdirir.

Nazirliyin Elmi-Tədqiqat Mamalıq və Ginekologiya İnstitutu (ETMGİ) martın 1-də Laçın şəhərində yeniyetmə dövründə olan qızlar arasında reproduktiv sağlamlıqla bağlı maarifləndirici aksiya və konsultasiyalar təşkil edib.

Bu barədə Aztibb.az-a Səhiyyə Nazirliyindən xəbər verilib.

Bildirilib ki, tədbirdə ETMGİ-nin həkim mama-ginekoloqları tematik təqdimatlarla çıxış ediblər.

İnstitutun həkimləri tərəfindən yeniyetmə dövründə orqanizmdə bir sıra dəyişikliklərin baş verdiyi haqqında məlumat verilib. Bundan əlavə, uşaq planlaşdırarkən, antenatal klinikada müntəzəm müayinələrdən keçməyin vacibliyi vurğulanıb. Həmçinin, şəxsi gigiyena qaydaları ilə bağlı konsultasiyalar verilib.

Maarifləndirici tədbir və aksiyada 100-ə yaxın qız və onların valideynləri iştirak ediblər.
Sonda tədbirin fəal iştirakçılarına hədiyyələr təqdim olunub.

Qeyd edək ki, Səhiyyə Nazirliyi tərəfindən işğaldan azad olunan digər ərazilərdə də davamlı olaraq sağlam həyat tərzinin təşviqi ilə bağlı maarifləndirici tədbirlərin və müayinə aksiyalarının keçirilməsi nəzərdə tutulub.