11-12 oktyabr 2024-ci il tarixlərində Bakı şəhərində Azərbaycan Radioloqlar Cəmiyyətinin IV beynəlxalq elmi–praktiki konfransı keçiriləcək.

 

Aztibb.az-ın xəbərinə görə, Avropa Radiologiya Məktəbinin (ESOR) və Azərbaycan Radioloqlar Cəmiyyətinin birgə təşkilatçılığı ilə baş tutacaq tədbirdə Azərbaycan, Türkiyə, Rusiya, Avstriya və İtaliyadan olan ekspertlər tərəfindən məruzələrin dinlənilməsi planlaşdırılır.

 

İlk gün ESOR tərəfindən təyin edilmiş xarici məruzəçilər tərəfindən toplam 2 sessiya olmaqla 6 mühazirə və 6 klinik nümunə çalışmaları təqdim olunacaq.

 

İkinci gün isə ənənəvi olaraq Azərbaycan Radioloqlar Cəmiyyətinin illik hesabatı dinləniləcək. Daha sonra Azərbaycanda tətbiq olunan radiologiyanın müasir metodları, o cümlədən radiologiya ilə sıx əlaqəli müzakirəli mövzular barədə yerli və xarici mütəxəssislər tərəfindən təqdimatlar ediləcək.

 

İştirakçıların radiologiya sahəsində biliklərini artırmaları və müxtəlif xəstəliklər zamanı ən son görüntüləmə metodlarının təklif etdiyi imkanlarla canlı olaraq daha yaxından tanış olmaları gözlənilir.

 

Konfransa proqrama uyğun olaraq müvafiq ixtisas üzrə həkimlər və rezidentlər qatıla bilər.

 

Tədbir Fairmont Baku Flame Towersdə baş tutacaq (Ünvan:Bakı şəh, Mehdi Hüseyn küç., 1A).