Azərbaycan Respublikasının Prezident İlham Əliyev və birinci xanım Mehriban Əliyevanın tapşırığına əsasən, prezidentin köməkçisi Anar Ələkbərov, səhiyyə naziri Teymur Musayev və Baş prokuror Kamran Əliyev Respublika Perinatal Mərkəzində baş vermiş yanğınla əlaqədar hadisə yerində olublar.

Səhiyyə Nazirliyindən Aztibb.az-a verilən məlumata görə, rəsmi şəxslərə yanğının başvermə səbəbləri və nəticələri barədə məlumat verilib.

Sonra Anar Ələkbərov, Teymur Musayev və Kamran Əliyev yanğın zamanı tüstüdən zəhərlənərək Kliniki Tibbi Mərkəzə yerləşdirilən zərərçəkənlərə baş çəkiblər və onların səhhəti ilə maraqlanıblar.

Səhiyyə Nazirliyi hadisə ilə əlaqədar vəfat edənlərin ailələrinə və yaxınlarına dərin hüznlə başsağlığı verir, xəsarət alanların tezliklə sağalmasını arzulayır.