Övladınızın nitqi yaşına görə ləngiyirsə, bu, iki faktorla bağlıdır, bioloji və sosioloji.

Aztibb.az xəbər verir ki, bununla bağlı NA-Loqopedik Psixoloji Mərkəzin məlumatında bildirlir.

Bioloji faktorlar – Qeyd edilir ki, bioloji faktorlar dedikdə, həm hamiləlik zamanı ananın keçirdiyi müxtəlif xəstəlikləri, zərərli amillərin təsirini, həmçinin doğuş travmalarını və doğuşdan sonra uşağın ilk aylarda keçirdiyi xəstəlikləri göstərmək olar.

Digər bioloji amillər uşağın keçirdiyi baş-beyin zədələnmələri, nevroloji, psixi, somatik və s. səbəblərlə bağlı ola bilər. Valideynlər bilməlidirlər ki, belə pataloji hallar uşaqlarda nəinki nitqin ləngiməsinə, hətta intellektin pozulmasına gətirib çıxarır.

Sosioloji faktorlar – Ailədə çox dillilik, pedaqoji baxımsızlıq, valideynlər arasında düzgün olmayan münasibətlər uşağın psixi və əqli inkişafına təsir göstərir.

Çox dilli ailələr hələ uşağın nitqi formalaşmamış ona iki və üç dildə müraciət edirlər ki, nəticədə nitqin formalaşması, anlama, qavrama bacarıqları ləngiyir.

Nitqin inkişafına təsir edən geniş yayılmış səbəblərdən biri də pedaqoji baxımsızlıqdır. İlkin yaşlarda uşaqla az ünsiyyətdə olmaq, onu oyuncaqlarla tək qoymaq, yaxud balacanın uzun müddət cizgi filmi izləməsinə imkan vermək, bir sözlə, ona lazım olan diqqətin göstərilməməsi uşağın ümumi, yəni, fiziki, psixi və əqli inkişafının ləngiməsinə səbəb olur.

Əgər siz uşaqlarınızın sərrast nitqinin, əqli və məntiqi təfəkkürünün yaşa uyğun inkişafını istəyirsizsə, ona ana bətnindən başlayaraq doğru yanaşmalısınız, onun kiçik dünyasına rəng qatan böyük kəşflərə zaman ayırmalısınız.

Beş yaşa qədərki inkişaf prosesi uşağın gələcək həyatının təməlidir. Övladınızın ilk yaşlardan şəxsiyyət kimi formalaşması sizin onu necə dəyərləndirmənizlə bağlıdır.
Sevgi və diqqətinizi doğru istiqəmətdə paylayın!