Aztibb.az xəbər verir ki, bu barədə Mingəçevir Şəhər Mərkəzi Xəstəxanasının həkim-pediatrı Növrəstə Hüseynova məlumat verib. O, qış fəslində düzgün qidalanmanın köməyi ilə immunitetə kömək etməyin xüsusilə əhəmiyyətli olduğunu bildirib.

 

Pediatr qeyd edib ki, uşaqlarda kəskin hava dəyişiklikləri zamanı immunitet aşağı düşür, onlar asanlıqla virus və bakterial infeksiyaya yoluxurlar. Xüsusilə bağça və məktəbə gedən uşaqlar günlərinin çoxunu qapalı mühitdə keçirdiklərinə görə, bu hallar daha çox müşahidə edilir. Çünki qapalı mühitlərdə infeksiya və virusların yayılma ehtimalı çox olur.

 

"İlk növbədə, viruslara yoluxmamaq, yaxud xəstəliyin ağırlaşmaması üçün uşaqlar açıq havada mümkün qədər çox olmalıdırlar. Pəncərələr açılaraq, tez-tez otağın havası dəyişdirilməlidir. Əgər uşaq xəstə halda bağçaya, məktəbə gedərsə, qoruyucu tənziflərdən, maskalardan istifadə olunmalıdır. Xəstəlik hallarında qızdırma varsa burun damcılarından, boğaz spreylərindən, qızdırmasalıcı dərmanlardan istifadə etmək olar. Virus əleyhinə xüsusi bir müalicələr yoxdur. Əgər ağırlaşmalar varsa, həkim nəzarətində bir sıra dərman preparatları ilə müalicə edilməlidir", - deyə Növrəstə Hüseynova bildirib.

 

Onun sözlərinə görə, istənilən növ virus infeksiyaları bakterial infeksiya ilə ağırlaşa bilər. Məsələn, üst tənəffüs yolunun infeksiyası varsa, bu, rinitə, pnevmoniyaya, sinusitə və s. keçə bilər. Bəzi viruslar var ki, beyinə təsir edərək, meningit yaranmasına səbəb olar. Mədə-bağırsaq infeksiyaları uşaqlarda ağırlaşaraq, bağırsaq qanamalarına və ishala, susuzlaşmaya gətirib çıxara bilər. Qidalanmaya xüsusi diqqət etmək lazımdır.  Qış aylarında meyvə tərəvəzə, göyərtilərə, meyvə qurularına üstünlük verilməlidir.

 

Pediatr xəbərdarlıq edib ki, virus infeksiyalarının yayıldığı bu dönəmlərdə xüsusən südəmər uşaqları mümkün qədər xəstə insanla təmasdan uzaq tutmaq lazımdır. Çünki, hər hansı virus infeksiyası onlarda asanlıqla ağırlaşma verə bilər: "Ona görə də südəmər körpələr mütləq həkim nəzarətində olmalıdır. Südəmər uşaqları evdə təbii üsullarla müalicə etmək qətiyyən düzgün deyil. Bu, bir sıra fəsadlara gətirib çıxara bilər. Bir də ən əsası, körpəni ana südü ilə qidalandırmaq lazımdır. Çünki ana südündə müəyyən qədər uşaqları qoruyan maddələr var".