Koronavirus pandemiyası çoxdan soyusa da, bir çoxları bəşəriyyətin qlobal miqyasda yeni xəstəliklərlə üzləşəcəyindən narahatdır. Virusoloq və tibb elmləri doktoru Svetlana Protasova bildirib ki, ən böyük təhlükə adi və quş qripinin birləşməsi ola bilər.

Aztibb.az "Actualnews"a  istinadən yazır ki, bu gün dünyada əksər ölkələrdə  qrip və kəskin respirator virus infeksiyaları üçün epidemiya həddi keçib. Bu vəziyyət quş və insan qripi viruslarının eyni hüceyrədə rastlaşa bilməsinə səbəb olur. Hipotetik olaraq, onların qarşılıqlı əlaqəsi sələflərindən çox daha ölümcül olacaq yeni bir virusun yaranmasına səbəb ola bilər.

Hazırda dövriyyədə olan quş qripinin ştammlarından biri 50% hallarda insanları öldürür. Yeni virusun potensial epidemiyası təkcə COVID-i deyil, 20-ci əsrin birinci yarısında milyonlarla insanın ölümünə səbəb olan ispan qripini də ötmək təhlükəsi yaradır.

"Hələ quş qripinə qarşı effektiv peyvəndlər yoxdur və bir çox insanlar koronavirusdan sonra immuniteti əhəmiyyətli dərəcədə zəiflədiblər. Nəticədə yeni pandemiyanın yayılması üçün optimal şərait yaradılır. Quş qripini sağaldan dərmanlar var, lakin onlar yoluxduqdan sonra ilk 48 saat ərzində qəbul edilməlidir!", - deyə mütəxəssis qeyd edib.