Rusiya alimləri yeni bakterial virus - mikobakteriofaq Vic9 aşkarlayaraq tədqiq ediblər.

Aztibb.az "İzvestiya" nəşrinə istinadən yazır ki, faqlar bakteriya hüceyrələrinə nüfuz edir, onları içəridən məhv edir, eyni zamanda çoxalır və yeni nəsil viruslar əmələ gətirir. Onlar adətən bir bakteriya növünə və ya hətta patogenin bir ştamına yönəldilir. Bu, faqları xəstə və onun normal mikroflorası üçün təhlükəsiz edir.

Rusiyanın Federal Tibbi və Bioloji Agentliyinin Lopuxin adına Federal Elmi və Kliniki Fizika-Kimya Mərkəzinin tədqiqatçıları Mycobacterium smegmatis bakteriyasından istifadə edərək torpaq nümunələrindən Vic9-u təcrid ediblər. Bu mikroorqanizm tez-tez tədqiqatlarda istifadə olunur, çünki o, genetik olaraq vərəm basilinə yaxındır, lakin insanlar üçün təhlükəsizdir. Bakteriofaqı əldə etmək üçün zənginləşdirmə kultura üsulundan istifadə olunub və vərəmin müalicəsində uğurlu vasitə kimi görülməkdədir.

Vic9 bakterial virusu bu qrupun Avrasiyada aşkar edilmiş ilk nümayəndəsi idi. Digər oxşar faqlar əvvəllər yalnız ABŞ və Braziliyada təcrid olunub.