Türkiyə Ticarət Nazirliyinin məlumatına görə, ölkə sağlamlıq turizmi sahəsində beynəlxalq akreditasiyaya malik 40 səhiyyə müəssisəsi ilə dünyada 7-ci yerdə qərarlaşıb və ötən il bu sahədən 2,3 milyard dollar gəlir əldə edib.

Aztibb.az-ın medimagazin.com.tr-yə istinadla xəbərinə görə, nazirlikdən verilən açıqlamada qeyd olunub ki, sağlamlıq səyahətləri sürətlə genişləndiyi bir vaxtda sağlamlıq turizminin ölkə iqtisadiyyatına əlavə dəyərinin artırılması, şirkətlərin beynəlxalq bazarlara açılması, rəqabət qabiliyyətinin və brendinqinin artırılması istiqamətində fəaliyyətlər dəstəklənir.

Açıqlamada, 2022-ci ildə səhiyyə xidməti ixracından 1,9 milyard dollar gəlir əldə edildiyi, 2023-cü ildə ölkəyə gələn 1,4 milyon sağlamlıq turisti ilə bu rəqəmin 2,3 milyard dollara çatdığı bildirilib.

Bundan başqa, ötən il sektor nümayəndələrinin təşkil etdiyi 12 ticarət və satınalma heyətinə dəstək verildiyi, Berlin və Londonda keçirilən sektorun 2 aparıcı yarmarkasında milli iştirak təşkilatının təşkil edildiyi qeyd olunub.