Mərkəzi Gömrük Hospitalında “UpToDate” klinik qərarlara dəstək sistemi sınaq dövründə istifadəyə verilib. Artıq platforma və mobil tətbiq vasitəsilə hospitalın bütün şöbələrində çalışan həkimlər, tibb bacıları və həkim-rezidentlər bu sistemdən 24/7 rejimində yararlana bilirlər.

 

Bu barədə Aztibb.az-a Hospitaldan bildirilib.

 

“UpToDate” platforması dünyanın ən nüfuzlu klinik qərarlara dəstək sistemlərindən biri hesab olunur. Sübuta əsaslanan təbabətin geniş tətbiqinə imkan yaradan bu sistem klinisistlərə gündəlik tibbi praktikada, eləcə də mürəkkəb və mübahisəli klinik hallarda diaqnostika və effektiv müalicə planının hazırlanmasında mühüm dəstək verir.

 

Hazırda Mərkəzi Gömrük Hospitalında bir sıra xarici klinikalar və universitetlərlə əməkdaşlıq əlaqələri inkişaf etdirilir, müasir tibbi texnologiyalar tətbiq olunur, həmçinin yeni tibbi prosedurların ölkədə ilk dəfə icrası istiqamətində innovativ yanaşmalar həyata keçirilir.

 

Mərkəzi Gömrük Hospitalı pasiyentlərin müayinə və müalicəsində tibbin ən son nailiyyətlərinin tətbiqinə xüsusi önəm və üstünlük verən respublikanın aparıcı hospitalları sırasındadır.

 

Qeyd edək ki, “UpToDate” sistemi ABŞ, Avropa ölkələri, Yaponiya, Avstraliya, Böyük Britaniya, Almaniya, İspaniya, Türkiyə və digər inkişaf etmiş ölkələrin həkimləri arasında geniş yayılıb və yüksək etimad qazanıb. Bu alət klinik qərarların qəbulunda etibarlı mənbə kimi istifadə olunur.