ABŞ-nin Con Hopkins Tibb Mərkəzinin alimləri tərəfindən aparılan yeni araşdırma sübut edib ki, həddindən artıq piylənmə olan insanlarda ürək əzələsi ciddi şəkildə zəifləyir. Lakin ən yaxşı xəbər odur ki, çəki atmaq bu prosesi geriyə qaytara və ürəyi yenidən gücləndirə bilir.

“MedicalXpress” portalının məlumatına görə, bir çox insan ürək çatışmazlığı dedikdə ürəyin qanı zəif vurmasını düşünür. Lakin piylənmədən əziyyət çəkənlərdə ürək çatışmazlığının fərqli bir növünə (“HfpEF”) daha çox rast gəlinir. Bu vəziyyətdə ürək normal qan vururmuş kimi görünür. Əslində isə ürək əzələsi sərtləşir, yavaş dincəlir və kifayət qədər qanla dola bilmir. Yeni araşdırma onu sübut edir ki, piylənmə olan xəstələrdə ürək əzələsinin hüceyrələri həm də fiziki olaraq çox zəifləmiş olur.

Alimlər çəki atma terapiyası keçən xəstələri müşahidə ediblər. Nəticələr çox ümidverici olub. Belə ki, bədən çəkisinin 10 faizdən çoxunu itirən insanlarda ürək əzələsinin yığılma qabiliyyəti demək olar ki, tam bərpa olunub. Bu, o deməkdir ki, piylənmənin ürəyə vurduğu zərər qalıcı deyil və çəki atmaqla bu vəziyyəti düzəltmək mümkündür. Tədqiqat zamanı alimlər ürəyin zəifləməsinə səbəb olan konkret bir zülal dəyişikliyi (troponin I) aşkar ediblər. Bu kəşf gələcəkdə piylənmədən əziyyət çəkən ürək xəstələri üçün xüsusi dərmanların hazırlanmasına yol açacaq. Alimlər bildiriblər ki, hər ürək xəstəliyi eyni deyil. Piylənməsi olan insanlar üçün bəzi ürək dərmanları zərərli ola bilər. Ona görə də bu tip xəstələr üçün ən təhlükəsiz və əlverişli yol təhlükəsiz çəki itirmə və həkim nəzarəti ilə düzgün müalicədir.