Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Sabunçu və Abşeron Sosial Xidmət Mərkəzlərində sosial reabilitasiya xidmətlərindən faydalanan əlilliyi olan uşaqların valideynləri üçün təlimlər təşkil edilib.

Agentliyin İctimaiyyətlə əlaqələr və kommunikasiya şöbəsindən Aztibb.az-a verilən məlumata görə, təlimlər zamanı valideynlərə uşaqlarının davranışlarını düzgün müşahidə etmək, qiymətləndirmək və effektiv müdaxilə planları hazırlamaq istiqamətində praktiki biliklər verilib, müzakirələr aparılıb və suallar cavablandırılıb.

Müzakirələrdə uşaqların hüquqlarının pozulması halları, bu kimi halların qarşısının alınması və valideynlərin üzərinə düşən hüquqi və mənəvi öhdəliklərə diqqət çəkilib. Agentliyin mütəxəssisləri, həmçinin uşaqların təhsil, sağlamlıq, müdafiə və ifadə azadlığı ilə bağlı hüquqları barədə məlumatlar veriblər.