Azərbaycan Qida Təhlükəsizliyi İnstitutu (AQTİ) ölkədə fəaliyyət göstərən laboratoriyaların texniki səriştəliliyinin obyektiv şəkildə qiymətləndirilməsi məqsədilə ət və ət məhsullarında salmonella spp. parametrinin keyfiyyətcə təyini üzrə növbəti səriştəlilik sınağını təşkil edir.

 

AQTİ-dən Aztibb.az-a verilən xəbərə görə, bu səriştəlilik sınağı laboratoriyaların analiz nəticələrinin düzgünlüyünün və etibarlılığının təmin edilməsi, sınaq nəticələrinin keyfiyyətinin, eləcə də personalın səriştəliliyinin artırılması, rutin analizlərin obyektiv qiymətləndirilməsi məqsədi daşıyır.

 

Sınaqlar ISO 17043:2023 “Uyğunluğun qiymətləndirilməsi – Səriştəlilik sınaqlarına ümumi tələblər” beynəlxalq standartı əsasında təşkil olunur və qiymətləndirmələr də bu standartın tələblərinə uyğun şəkildə aparılır. Sınaqda iştirak üçün son müraciət tarixi 31 iyul 2025-ci ildir. Laboratoriyalar “Müraciət forması”nı dolduraraq info.pt@afsa.gov.az elektron ünvanına göndərməlidirlər.

 

Sınaq nəticələri tamamlandıqdan sonra isə “Nəticələrin qeydiyyat forması” eyni ünvan vasitəsilə təqdim olunmalıdır. Sınaq proqramı və iştirakla bağlı sənədlərlə AQTİ-nin rəsmi internet səhifəsində (www.afsi.gov.az) “Səriştəlilik sınaqları” bölməsində tanış olmaq mümkündür. Sınaq nəticələri İnstitutun saytında individual laboratoriya nömrələri ilə açıqlanacaq və nəticələrin konfidensiallığı tam şəkildə qorunacaq. Azərbaycan Qida Təhlükəsizliyi İnstitutu bütün müvafiq laboratoriyaları bu mühüm sınaqda iştirak etməyə dəvət edir.