Amerikalı elm adamları müəyyən ediblər ki, beynimiz xəyalla gerçəyi ayırd etmək üçün düşündüyümüz qədər mürəkkəb mexanizmə malik deyil.

Aztibb.az xəbər verir ki, ABŞ-da aparılan yeni araşdırmaya görə, beynin bir hissəsindəki aktivlik səviyyəsi, ora çatan siqnalın gücündən asılı olaraq görüntünün gerçək olub-olmadığını hiss etdirir.

Həmin hissəyə "fusiform girus" (beyində temporal və oksipital payların alt səthində yerləşən beyin qırışı) deyilir. Bu bölgə həm gerçək görüntünü gördüyü zaman, həm də onu xəyal etdikdə aktivləşir. Amma əsas fərq ondadır ki, xəyal edəndə bu bölgədəki siqnal zəif, gerçək görəndə isə daha güclü olur. Ona görə beyin  müəyyən bir səviyyədən yüksək siqnalı gerçək kimi qəbul edir. Təcrübələrə 26 nəfər cəlb edilib. Onlardan bəzilərinə ekranda xətlər göstərilib. Bəzilərindən isə bu xətləri xəyal etmələri istənilib.

Nəticədə məlum olub ki,  insanlar hansı görüntünü gözləyir və xəyal edirsə, bunu beyin gerçək kimi qəbul edir. Yəni, gözlə görməsə belə, sanki görmüş kimi olur.

Alimlər gələcəkdə üzlər, heyvanlar və əşyalar kimi daha mürəkkəb görüntülərlə testlər aparmaq istəyirlər. Onların fikrincə, bu tapıntı xəyalla gerçəyi ayırmağın çox sadə izahını verir və halüsinasiyaların necə yarandığını anlamağa  kömək edə bilər.