Azərbaycan və Qazaxıstan Səhiyyə nazirliklərinin birgə təşkilatçılığı ilə iyulun 10-da tibb bacılığı sahəsində əməkdaşlığa dair onlayn görüş keçirilib.

Səhiyyə Nazirliyindən Aztibb.az-a verilən xəbərə görə, görüş zamanı iki qardaş ölkə arasında tibb bacılarının texniki və peşəkar inkişafı sahəsində qabaqcıl təcrübələrin və ən yaxşı praktikaların mübadiləsi məsələləri müzakirə olunub. Xüsusilə, peşəkar bilik və bacarıqların artırılması, müasir tibb bacısı peşəsinin tələblərinə cavab verən kadrların hazırlanması və onların peşə fəaliyyətində daha yüksək keyfiyyətə nail olunması istiqamətində əməkdaşlığın gücləndirilməsi üçün atılacaq addımlar barədə fikir mübadiləsi aparılıb.

Eyni zamanda, tərəflər gələcəkdə birgə layihələrin həyata keçirilməsi, müştərək seminar və treninqlərin təşkil olunması, elmi-tədqiqat və mübadilə proqramlarının inkişaf etdirilməsi məsələlərində razılığa gəliblər.

Bu əməkdaşlıq hər iki ölkənin səhiyyə sistemlərinin və tibb bacısı peşəsinin inkişafına dəstək verəcək, həmçinin regional və beynəlxalq səviyyədə tibb bacılarının peşəkar səviyyəsinin yüksəldilməsinə xidmət edəcək.