Abşeron Rayon Mərkəzi Xəstəxanasının direktoru Səkinə Sadıxova və baş həkim Fərrux Sədirov tibb müəssisəsində stasionar müalicə alan xəstələrlə yanaşı, burada müalicə olunan Vətən müharibəsi qazilərini də ziyarət ediblər.
Xəstəxanadan Aztibb.az-a bildirilib ki, ziyarət çərçivəsində xəstələrlə fərdi söhbətlər aparılıb, onların səhhəti, göstərilən tibbi xidmətin keyfiyyəti və ümumi şəraitlə bağlı fikirləri dinlənilib. Qazilərlə keçirilən görüşdə isə onların hər birinə xüsusi diqqət və həssaslıqla yanaşılıb, göstərilən tibbi və psixoloji dəstək imkanları barədə məlumat verilib.
Xəstələr və qazilər yaradılmış yüksək səviyyəli şəraitə, peşəkar tibbi personalın xidmətinə görə başda Azərbaycan Respublikasının Prezidenti cənab İlham Əliyev olmaqla, TƏBİB-ə, İcbari Tibbi Sığorta üzrə Dövlət Agentliyinə, eləcə də xəstəxana rəhbərliyinə minnətdarlıqlarını bildiriblər. Onlar, həmçinin ölkədə həyata keçirilən uğurlu səhiyyə islahatları və əhaliyə göstərilən diqqət və qayğıdan məmnunluqlarını ifadə ediblər.
Ziyarətin sonunda xəstəxana rəhbərliyi tərəfindən vətəndaşlara sağlamlıqlarının tezliklə bərpa olunması arzulanıb və tibbi heyətə yüksək səviyyəli xidmətin davam etdirilməsi ilə bağlı tövsiyələr verilib.
