Ürəyimiz şirniyyat istəyəndə ağlımıza ilk olaraq şokolad gəlir, ancaq çəki artımına səbəb olacağını düşündüyümüzdən özümüzü saxlamağa çalışırıq.

Aztibb.az xəbər verir ki, son araşdırma şokoladı müəyyən saatda yeməyin faydalı olduğunu, hətta arıqlamağa da kömək etdiyini ortaya çıxarıb.

Harvard Tibb Məktəbinin alimləri tərəfindən aparılan yeni araşdırmaya görə, müəyyən bir zamanda yeyilən südlü şokolad yağ yandırılmasını dəstəkləyə bilər. Lakin tədqiqatçılar vurğulayırlar ki, bu təsir yalnız konkret saat aralığında özünü göstərir. "FASEB Journal"da dərc olunan araşdırmada tədqiqatçılar 45 yaşdan yuxarı qadınlarla təcrübə aparıblar. İştirakçılara səhər oyandıqdan bir saat sonra və gecə yatmazdan bir saat əvvəl 100 qram südlü şokolad verilib. Tədqiqatın nəticələri şokolad yeməyənlərlə müqayisə edilib. Həm səhər, həm də axşam şokolad qəbul edən qruplarda çəki artımı müşahidə olunmayıb. Üstəlik, səhər şokolad yeyən qadınların bədən yağ nisbətlərində və qan şəkəri səviyyələrində azalma qeydə alınıb. Məlum olub ki, səhərlər şokolad yemək gün ərzində ümumi kalori qəbulunu 16 faiz azaldır. Tədqiqatçılar bildiriblər ki, bu zaman enerji qəbulu yüksəlsə də, şokoladdan istifadə edənlərin iştahının azalması çəki artımının qarşısını alır.