İsti yay günlərinin sərinləşdirici qidalarından olan qarpızı ağ pendirsiz təsəvvür etmək çətindir. Lakin qida mütəxəssisləri bu məhsulların birlikdə istehlakının əleyhinədirlər. Onlar qarpızı pendirlə deyil, qozla yeməyi tövsiyə edirlər.

Aztibb.az-ın məlumatına görə, diyetoloqlar söyləyirlər ki, qarpız yüksək glisemik indeksə malik olduğundan, tək yeyildikdə qan şəkərini sürətlə artıra bilər. Bu isə qısa müddətdə yenidən aclıq hissinə və balanssız qidalanmaya səbəb olur. Ancaq bu anda qoz qarpızın tamamlayıcısına çevrilir.

Mütəxəssislərin fikrincə, qoz tərkibindəki sağlam yağlar, protein və lif sayəsində qarpızın qlisemik təsirini tarazlaşdırır. Qarpız qozla birgə yeyildikdə qan şəkəri tədricən yüksəlir, toxluq müddəti uzanır, enerji daha balanslı şəkildə istifadə olunur. Bundan əlavə, mütəxəssislər xüsusilə yeməklər arasında qarpızla birlikdə 3-4 qozun yeyilməsinin şəkərə olan həvəsin qarşısını ala biləcəyini bildirirlər.