Quba Rayon İcra Hakimiyyəti və Mərkəzi Qan Bankının birgə təşkilatçılığı ilə talassemiyalı və hemofiliyalı xəstələrə yardım məqsədilə Mərkəzi Qan Bankının Quba bölməsində qanvermə aksiyası keçirilib.

 

Quba Rayon Mərkəzi Xəstəxanasından Aztibb.az-a bildirilib ki, Quba Rayon İcra Hakimiyyətinin başçısı İlqar Mahmudov, Quba RMX-nın direktoru Əliyar Sərvərov, eləcə də hüquq-mühafizə orqanlarının rəhbərliyi və əməkdaşları, din xadimləri, rayonda fəaliyyət göstərən müxtəlif idarə, müəssisə və təşkilatların kollektivləri, həmçinin rayon ictimaiyyətinin nümayəndələri qanvermə aksiyasında fəal iştirak ediblər.

 

Gün ərzində davam edən aksiyada onlarla donor qan verərək talassemiyalı və hemofiliyalı uşaqlar başda olmaqla, ehtiyacı olanların həyatına ümid olublar.

 

Aksiyanın məqsədi daimi qan ehtiyatlarının yaradılması və həyat üçün vacib ehtiyacı olanlara yardım göstərməkdir.