Harvard İctimai Sağlamlıq Məktəbinin alimləri tərəfindən aparılan yeni tədqiqat göstərib ki, meşə və struktur yanğınlarından yaranan tüstü sağlam fərdlərdə belə immun sistemində ciddi və davamlı dəyişikliklərə səbəb ola bilər.

Aztibb.az www.sciencedaily.com-a istinadla xəbər verir ki, tədqiqatın nəticələri “Nature Medicine” jurnalında dərc olunub.

Professor Kari Nadeau və Dr. Con Rokun rəhbərliyi ilə aparılan bu araşdırma yanğın tüstüsünün təkcə tənəffüs və ürək-damar sağlamlığına deyil, eyni zamanda, immun sisteminə də hüceyrə səviyyəsində təsir etdiyini sübuta yetirir. Tədqiqatçılar tüstüyə məruz qalan və qalmayan, sağlam, immunomodulyator dərmanlar qəbul etməyən iki qrup yetkinin qan nümunələrini müqayisə ediblər. Tədqiqatda 31 nəfər tüstüyə məruz qalan (yanğınsöndürənlər və mülki şəxslər) və 29 nəfər məruz qalmayan şəxslər iştirak ediblər.

Tüstüyə məruz qalan şəxslərdə yaddaş CD8+ T hüceyrələrində və kemokin reseptor biomarkerlərində artım aşkarlanıb. Bu hüceyrələr iltihab və immun reaksiyalarla birbaşa əlaqəlidir. Eyni zamanda tüstüyə məruz qalan şəxslərdə allergiya və astma ilə bağlı 133 gen ifadəsində dəyişikliklər müşahidə olunub. Əlavə olaraq, bu şəxslərin immun hüceyrələrində civə və kadmium kimi zəhərli metallar aşkarlanıb.

Baş tədqiqatçı Meri Consonun sözlərinə görə, bu nəticələr immun sisteminin yanğın tüstüsü kimi ətraf mühit faktorlarına nə dərəcədə həssas olduğunu sübut edir.