“Yayda burun-boğaz, qulaq əməliyyatı etdirmək olmaz” deyə bir mif gəzir. Bu, tamamilə yanlış fikirdir. Sovet dövründə istirahətə gedən həkimlərin uydurduğu fikirdir. Yay xüsusən burunda əməliyyat keçirilməsi üçün əks göstəriş deyil.

 

Bu barədə Aztibb.az-a Xətai Tibb Mərkəzinin Otorinolarinqologiya şöbəsinin müdiri, LOR cərrahı Vahid Mehdiyev bildirib.

 

Həkim qeyd edib ki, yayda hər cür vitaminli meyvə tərəvəzlərlə qidalandığımız üçün bərpa prosesi sürətli olur. Yayda qan qışdakına nisbətən daha qatı olur ki, bu da qanaxma təhlükəsini azaldır. Temperatur rejimi bərpa dövrünə yaxşı təsir edir, reabilitasiyanı daha da sürətləndirir. Günəş təbii kollagen, elastin ifrazına təsir edərək mübadilə proseslərini fəallaşdırır. Buna görə də çapıqlar sürətlə sağalır.

 

Onun sözlərinə görə, daha bir üstünlük – sosial-psixoloji amildir. Yay həmişə istirahəti yada salır. Buna görə cərrahi müdaxilədən sonra rahatlıqla evdə oturmaq olar. Pasiyent aktiv həyat tərzinə davam edə də bilər.