Hansas Knell adına Təbiət Məhsulları və İnfeksiya Biologiyası İnstitutu ilə Maks Plank Cəmiyyətinin Kimyəvi Ekologiya İnstitutunun alimləri ilk dəfə olaraq “Clostridium thermocellum anaerob” bakteriyasının istehsal etdiyi parlaq sarı rəngli YAS piqmentinin molekulyar tərkibini öyrəniblər. Məlum olub ki, bu piqment gələcəyin antibiotikləri üçün əsas rolunu oynaya bilər.

Aztibb.az www.eurekalert.org-a istinadla xəbər verir ki, tədqiqatın nəticələri “Angewandte Chemie International Edition” (ACIE) jurnalında dərc olunub.

“Clostridium thermocellum” bitkilərin hüceyrə divarlarının əsas komponenti olan sellülozu parçalamaq və onu bioyanacaq istehsalı üçün istifadə oluna biləcək şəkərə çevirmək qabiliyyəti ilə tanınır. YAS (Yellow Affinity Substance) piqmenti sellüloz liflərinə birləşərək fermentlərin onları daha səmərəli parçalamağına kömək edir.

Alimlər müəyyən ediblər ki, YAS piqmenti sellüksanten molekullarından ibarətdir. Bu molekulların quruluşunu spektroskopiya üsulu ilə təyin etmək mümkün olub. Eyni zamanda onların sintezinə məsul olan genetik klaster də aşkarlanıb.

Tədqiqatçılar üçün gözlənilməz olan isə sellüksantenlərin antibiotiklərə davamlı patogenlər də daxil olmaqla, qram-müsbət bakteriyalara qarşı antibakterial fəallıq göstərməsi olub. Bu isə həmin maddələr əsasında yeni antibakterial preparatların hazırlanması üçün perspektivlər verir.

“Bu sarı piqmentlər demək olar ki, yüz ildir məlum idi, lakin onların dəqiq quruluşu indiyədək sirr olaraq qalırdı. İndi biz onların ekoloji funksiyalarını, o cümlədən sellülozu rəqiblərdən qoruma funksiyasını daha dərindən öyrənə bilərik”, – deyə tədqiqatın həmmüəllifləri Keyşi İşida və Yana Krabbe bildiriblər.