Gürcüstanın paytaxtı Tbilisi şəhərində Şərqi Avropa, Yaxın Şərq və Afrika regionunu əhatə edən regional forum keçirilib.

Səhiyyə Nazirliyindən Aztibb.az-a verilən məlumata görə, tədbir İnsan Papilloma Virusunun (HPV) səbəb olduğu xəstəliklərin aradan qaldırılmasına və bu istiqamətdə görülən tədbirlərin gücləndirilməsinə həsr olunub.

Forumun əsas məqsədi HPV infeksiyasına qarşı mübarizə yollarını, peyvəndlənmə strategiyalarını, bu sahədə son 20 ildə əldə edilmiş qlobal təcrübəni və müasir elmi yanaşmaları müzakirə etmək olub.

Azərbaycanı forumda Səhiyyə Nazirliyinin Qadın, ana, uşaq və yeniyetmələrin müdafiəsi sektorunun müdiri Aynurə Zeynalova və İctimai Səhiyyə və İslahatlar Mərkəzinin direktoru Səbinə Babazadə təmsil ediblər.

Tədbirdə Azərbaycanla yanaşı, Avstriya, Birləşmiş Ərəb Əmirlikləri, İsveçrə, Gürcüstan, Qazaxıstan, Özbəkistan və digər ölkələrin səhiyyə sahəsində aparıcı mütəxəssisləri, infeksionistlər və peyvəndləmə üzrə ekspertlər iştirak ediblər.

İki gün ərzində panel müzakirələri, elmi təqdimatlar və praktiki sessiyalar təşkil olunub. Forumda regionda HPV-yə qarşı mübarizənin gücləndirilməsi və beynəlxalq əməkdaşlığın vacibliyi xüsusi vurğulanıb.