Uzun illərdir elm adamları kişi və qadınların ürək döyüntülərindəki fərqlə bağlı suala cavab axtarırdılar: nə üçün qadınlarda ürək döyüntüləri daha sürətli olur? Halbuki kişilərdə ürək ritminin pozulması - məsələn, qulaqcıq fibrillyasiyası (atrial fibrilasiya) daha çox müşahidə edilir.

Aztibb.az xəbər verir ki, Ohayo Ştat Universitetinin Veksner Tibb Mərkəzində aparılan yeni araşdırmada suala müəyyən aydınlıq gətirilib. Araşdırma göstərib ki, bu fərq ürək ritmini və aritmiya həssaslığını müəyyən edən genetik amillərlə bağlıdır. Tədqiqatçılar donorların ürəklərini tədqiq edərək sinoatrial düyünün (ürəyin sağ atriumunda yerləşən kardiostimulyator toxuma) kardiostimulyator hüceyrələrində unikal genetik quruluşları müəyyənləşdiriblər.

Genetik təhlillər nəticəsində cinslər arasında fərqliliklər aşkar edilib. Araşdırmalarda qadınlarda daha sürətli ürək döyüntüsünü yaradan genlərin yüksək səviyyədə olduğu ortaya çıxıb. Kişilərdə isə elektrik keçiriciliyini pozan iltihab və kollagen istehsalı ilə əlaqəli genetik şəbəkələrin daha aktiv olduğu müəyyən edilib.

Tədqiqatçılar düşünürlər ki, bu kəşf ürək ritminin pozğunluqlarının müalicəsində fərdiləşdirilmiş terapiya üçün yeni imkanlar yarada bilər.