Kaliforniya Universiteti, İrvine (UC Irvine) alimlərinin apardığı yeni bir araşdırma artan temperatur və əhalinin yaşlanmasının birgə təsirlərinin sağlamlıq üçün necə ciddi nəticələr doğura biləcəyini üzə çıxarıb.

Aztibb.az “MedicalXpress” portalına istinadla xəbər verir ki, “Science of the Total Environment” jurnalında dərc olunan araşdırmaya görə, yüksək temperatur dalğaları yaşlandıqca zəifləyən immun sistemini daha da çətin vəziyyətə salır və bu, ölümcül infeksiyalara, xüsusilə də Vibrio vulnificus bakteriyasına qarşı həssaslığı artırır.

Vibrio vulnificus, əsasən isti və duzlu sularda rast gəlinən, nadir, lakin çox təhlükəli bir bakteriyadır. Alimlərin fikrincə, iqlim dəyişikliyi ilə əlaqəli daha isti dəniz suları bu bakteriyanın yayılmasını asanlaşdırır.

Tədqiqat yaşlı insanların isti hava şəraitində bu bakteriyaya qarşı daha zəif müqavimət göstərdiyini ortaya qoyub.

UC Irvine komandası siçanlar üzərində apardığı eksperimentlərdə həm gənc, həm də yaşlı siçanları yüksək temperatur şəraitinə məruz qoyaraq onların bağırsaq sağlamlığı və immun funksiyalarını analiz edib. Yaşlı siçanlarda bağırsaq baryerinin pozulması, iltihab səviyyəsinin artması və immun sistemin zəifləməsi kimi ciddi fəsadlar müşahidə olunub. Eyni zamanda, onların bağırsaq mikrobiomunda antibiotiklərə davamlı genlərin sayı da artmışdı. Tədqiqat, həmçinin bir ümidverici nəticə də göstərdi: “Roseburia intestinalis” adlı faydalı bir bağırsaq bakteriyası ilə müalicə olunan yaşlı siçanlarda immun hüceyrə funksiyası bərpa olunub və infeksiya əlamətləri azalıb. Bu nəticələr göstərir ki, probiyotik dəstəyi istilik stressinə qarşı immun sisteminin müdafiəsini gücləndirə bilər. Bu tədqiqat yaşlanan əhali və istiləşən iqlimin birgə təsirlərini anlamağa kömək edərək gələcəkdə profilaktik tədbirlərin hazırlanmasında mühüm rol oynaya bilər.