TƏBİB Akademiyasının beynəlxalq təcrübə proqramı çərçivəsində Rusiya Federasiyasının Tümen şəhərində fəaliyyət göstərən cərrah-mama-ginekoloq Tahmina Ağakişiyeva Yeni Klinikanın Mama-ginekologiya şöbəsində iki həftəlik təcrübə proqramında iştirak edib.

 

Aztibb.az-a Yeni Klinikadan verilən məlumata görə, proqram çərçivəsində Dr.Tahmina Ağakişiyeva klinikanın qabaqcıl mütəxəssisləri ilə yanaşı, praktik bilik və bacarıqlarını təkmilləşdirmək imkanı qazanıb. Təcrübə müddətində klinikanın gündəlik fəaliyyətində yaxından iştirak edən mütəxəssis proqramı uğurla başa vuraraq sertifikatla təltif olunub.

 

Təcrübə proqramının bağlanış görüşü Yeni Klinikanın direktor müavini, Cərrahiyyə və transplantasiya mərkəzinin rəhbəri Eldar Əhmədovun iştirakı ilə baş tutub.

 

Görüş zamanı proqramın yüksək səviyyədə təşkili və effektiv elmi-praktiki mühitin yaradılmasına görə Ginekologiya şöbəsinin müdiri Vüsalə Əzizovaya TƏBİB Akademiyası adından təşəkkürnamə təqdim olunub.

 

Qeyd edək ki, TƏBİB Akademiyası tərəfindən həyata keçirilən bu kimi beynəlxalq təcrübə proqramları tibb sahəsində bilik və bacarıq mübadiləsinin genişləndirilməsini, regionlararası elmi əməkdaşlığın gücləndirilməsini və gənc mütəxəssislərin inkişafına dəstək verilməsini əsas hədəf kimi müəyyənləşdirib.