Tafts Universitetinin (ABŞ) alimləri yeni bir araşdırmada qəhvə istehlakı ilə ölüm riski arasındakı əlaqənin içkiyə əlavə edilən dadlandırıcıların və doymuş yağların miqdarından asılı olaraq dəyişdiyini aşkar ediblər.

Aztibb.az xarici mediaya istinadla xəbər verir ki, “The Journal of Nutrition” jurnalında dərc olunan araşdırma göstərib ki, gündə 1-2 stəkan kofeinli qəhvə içmək bütün səbəblərdən ölüm riskini aşağı salmaqla yanaşı, ürək-damar xəstəlikləri səbəbindən də həmin ehtimalı azaldır.

Bu içkidən imtina etməklə müqayisədə qara, eləcə də aşağı şəkər və doymuş yağ tərkibli qəhvə bütün səbəblərdən ölüm riskini 14 faiz azaldıb. Bununla belə, eyni əlaqə yüksək şəkərli və doymuş yağ tərkibli qəhvə üçün müşahidə edilməyib.

Tədqiqatın əsas müəllifi, professor Fan Çjan bildirib: “Amerikalı yetkinlərin demək olar ki, yarısının gündə ən azı bir fincan qəhvə içdiyini nəzərə alsaq, bunun sağlamlığa necə təsir edə biləcəyini bilmək bizim üçün vacibdir. Qəhvənin sağlamlıq faydaları tərkibindəki bioaktiv birləşmələrlə bağlı ola bilər, lakin bizim nəticələrimiz göstərir ki, şəkər və doymuş yağ əlavə etmək içkinin bu müsbət cəhətlərini azaldır”.

Tədqiqatın gedişində 1999-2018-ci illər arasında milli sağlamlıq və qidalanma müayinəsində iştirak edən 20 və daha yuxarı yaşda olan 46 min yetkindən ibarət böyük qrupun nümunələrindən alınan məlumatlar təhlil edilib. Qəhvə istehlakı növə (kofeinli və ya kofeinsiz), şəkərin tərkibinə və doymuş yağ tərkibinə görə təsnif edilib. Müəyyən olunub ki, içki çox şirin və ya yağlı olarsa, onun sağlamlıq faydaları itir. Gündəlik qəhvə fincanlarının sayının artırılması daha aydın təsirə səbəb olur, ancaq bu, üç stəkana qədər olan hallara aiddir. Bu həddən yuxarı içildikdə, qəhvənin heç bir faydası müşahidə edilmir. Bundan əlavə, tədqiqat qəhvə istehlakı ilə xərçəng ölümünün azalması arasında bir əlaqə tapmayıb, həmçinin kofeinsiz qəhvə içənlərdə də heç bir müsbət effekt qeydə alınmayıb.