Alimlər yüksək effektə malik diabet dərmanlarının yeni sinfini təqdim ediblər. Bu preparat qanda qlükoza səviyyəsini normallaşdırır, həzm və əzələ kütləsinə təhlükəli yan təsirləri olmadan xəstələrə artıq çəki ilə mübarizə aparmağa kömək edir.

Aztibb.az www.nytimes.com-a istinadla xəbər verir ki, İsveçin Karolinska İnstitutunun mətbuat xidmətinin məlumatına görə, Avstraliya və Avropa molekulyar bioloqları qanda qlükoza səviyyəsini normallaşdıran, həzm və əzələ kütləsinə təhlükəli yan təsirlər olmadan xəstələrə artıq çəki ilə mübarizə aparmağa imkan verən diabet və piylənməyə qarşı dərmanların yeni sinfini hazırlayıblar.

Karolinska İnstitutunun dosenti Şeyn Rayt bildirib: “Hazırladığımız preparat tamamilə yeni diabet dərmanları sinfinə aiddir və eyni zamanda, piylənmə və insulin müqavimətinin müalicəsi üçün böyük potensiala malikdir. Bizim maddə artıq çəkidən təhlükəsiz şəkildə qurtulmağa kömək edir, həmçinin onun istifadəsi üçün daimi və ya dövri inyeksiya tələb olunmur”.

Alimlərin qeyd etdiyi kimi, son illərdə eyni anda bir neçə diabet dərmanı hazırlanıb. Məsələn, semaqlutid və ya liraqlutid piylənmədən və 2-ci tip diabetdən olduqca tez və yüksək ehtimalla xilas olmağa imkan verir. Bütün bu birləşmələr mədəaltı vəzində insulin istehsalını tənzimləyən, insanların və heyvanların beynində toxluq hissinin yaranmasına cavabdeh olan GLP-1 hüceyrə reseptorlarına təsir göstərir.

Alimlər kəşf ediblər ki, onların yaratdığı və quruluşca damar genişləndirən dərman olan bametana oxşar molekul bu işin öhdəsindən gələ bilər. Tədqiqatçıların hazırladığı “maddə-15” əzələ hüceyrələrinin səthindəki beta-adrenergik reseptorlara təsir göstərir, lakin qan damarlarının və ya bronxların divarlarını genişləndirmir. Əksinə, qanda insulinin nisbətindən asılı olmayaraq qlükozanı daha aktiv şəkildə yandırır, bu da onunla əlaqəli yan təsirlərin qarşısını almağa kömək edir.

Tədqiqatçılar bu molekulun elə bir strukturunu seçiblər ki, o, yalnız skelet əzələlərinə oxşar təsir göstərir və hüceyrələrində çoxlu sayda beta-adrenergik reseptorların olduğu ürəyə təsir etmir. Siçanlar və könüllülər üzərində aparılan təcrübələr göstərdi ki, “maddə-15” effektivliyinə görə liraqlutiddən geri qalmır, eyni zamanda, onun istifadəsi əzələ atrofiyasına və həzm problemlərinə səbəb olmur. Alimlər ümid edirlər ki, bu irəliləyişlər yaxın gələcəkdə piylənmə əleyhinə dərmanların daha təhlükəsiz və rahat olmasına imkan verəcək.