Bristolda yerləşən 3D Tibbi  Texnologiyalar Mərkəzinin mütəxəssisləri ağır qəza keçirmiş  Dave Richards adlı velosipedçinin  üzünü bərpa ediblər. O, 3D çap texnologiyası ilə hazırlanmış fərdi üz protezləri qoyulan ilk Böyük Britaniya sakini olub.

Bu barədə Aztibb.az www.bbc.com-a istinadla məlumat verir.

Dave Richards  2021-ci ildə  avtomobilin altında qalaraq  bədəninin, o cümlədən üzünün sağ tərəfində ciddi yanıq və əzilmə xəsarətləri alıb. Ona fərdi üz örtüyü və çapıqlar üçün boyun qoruyucusu hazırlanıb. Proses velosipedçinin üzünün 3D skan olunması ilə başlayıb, daha sonra mərkəzin mütəxəssisləri rəqəmsal model yaradaraq protezi hazırlayıblar.

Velosipedçinin sözlərinə görə, protezlər onda özünəinam hissi yaradıb. Aprel ayında istifadəyə verilmiş Bristol 3D Tibbi Mərkəzi Böyük Britaniyada 3D skan və çap texnologiyalarını bir araya gətirən ilk qurum hesab olunur. Burada, eyni zamanda, mürəkkəb əməliyyatlara hazırlıq məqsədilə  damar və sinir detalları ilə zədələnmiş orqanların modelləri yaradılır. Mərkəzin əsas texnologiyalarından biri 200 dərəcə Selsiyə qədər temperaturda işləyən PEEK printerdir.